အားလုံးရဲ့အစကတော့ သားဖွားမီးယပ်ဆရာဝန်ဆီကပဲ။ လူ့လောကထဲ လည်ပတ်ဖို့ ပထမဆုံးသံပတ်တစ်ရစ်ကို သူစပေးလိုက်တာပဲ။ အဲ့ကနေ တစ်နေ့ထက်တစ်နေ့ သံပတ်ကတဖြည်းဖြည်းတင်းလာလိုက်တာ သတိထားမိတဲ့အချိန်မှာ အသက်ရှူအတော်ကျပ်နေပြီ။ သနားပြီး ဘယ်သူကမှ သံပတ်ထပ်မတင်းပါနဲ့တော့ မတားပေးကြ။ ကိုယ်တိုင်က သံပတ်ရုပ်ဖြစ်နေတော့ ဆက်မလှုပ်ရှားတော့အောင် ရပ်ပစ်လိုက်ဖို့ကလည်း အစွမ်းအစမရှိ။ ခါးမှာချီထားတဲ့အထုတ်ထဲက အိမ်မက်တွေက အလေးချိန်အားဖြင့် ခန္ဓာကိုယ်နဲ့မလိုက်။ ပစ်ချထားလိုက်ဖို့ကျတော့လည်း တစ်စချင်းဆီကိုယ်စုခဲ့တာဆိုတော့ မလုပ်ရက်။ ဒီလိုနဲ့ ငါ့ကိုငါလှုပ်ရှားမှုမရပ်တန့်အောင် အတော်ကြိုးစားရတယ်။ ဘယ်လောက်ပင်ပန်းနေပါစေ ငါမရပ်ချင်ဘူး။ စောက်ကျင့်က မလှုပ်ရှားနိုင်တော့ရင် အိမ်မက်တွေချည်း ထုတ်ကြည့်မိတာ။ သူတို့ကိုလည်း မျက်နှာပူရပေါင်း မနည်းဘူး။ ဒီတော့ သူတို့မျက်နှာနဲ့ လုပ်နေရတာပဲ။ ဘာပဲဖြစ်ဖြစ် မဖြည့်ဆည်းပေးနိုင်တောင် ‘ငါကြိုးစားနေတာပဲ မမြင်ဘူးလား’လို့ လှမ်းဟောက်လို့ရတာပေါ့။ အိမ်မက်တွေကို ဆန္ဒပြီးမြောက်အောင်လုပ်ပေးဖြစ်မလား ငါ့သံပတ်အရင်ကုန်မလားတော့ ငါရန်ခုန်စွာနဲ့စောင့်နေလိုက်မယ်။ အဆင်မပြေတိုင်း သားဖွားဆရာဝန်ကို တစ်ချက်စိတ်ဆိုးမယ်။ အရာရာဟာ သူ့လက်ထဲကစတာ။ သူလုပ်ပိုင်ခွင့်ရှိတုန်းမှာ ငါ့အခွင့်အရေးတွေ သူပဲဖြုန်းတီးပစ်ခဲ့တာ။ အသက်ရှည်ကျန်းမာပါစေ ဒေါက်တာ။ ဒါမှ ခဏခဏ အပြစ်တင်ခွင့်ရမှာ။
လူတော်တော်များများ အနက်ရောင်ကို ကြိုက်ကြတယ်။ ဘာလို့ကြိုက်လဲဆိုပြီး အတိအကျ မရှိပေမယ့် အနက်ရောင်မို့လို့ ကြိုက်ကြတာများတယ်။ အနက်ရောင်ဟာ အရောင်တွေထဲမှာပါနေလို့သာ အရောင်လို့ပြောရတာ သူက ဘာအရောင်မှ မဟုတ်နေဘူး။ ဘာလို့ဘာအရောင်မှ မဟုတ်ရတာလည်းဆိုတာ သူက နက်နေတာကိုး။ သူက အရောင်တွေအကုန်လုံးရဲ့ စိတ်အညစ်ဆုံးအချိန် ဖြစ်လိမ့်မယ်။ RGB Color Code မှာဆိုရင် အနီရယ်၊ အစိမ်းရယ်၊ အပြာရယ် အချိုးတူအောင်ပေါင်းရင် အဖြူရောင်ရတယ်။ အဖြူရောင်ဆိုတာက ပြောစရာမလိုအောင် ဖြူစင်တယ်။ ဒါပေမယ့် အနက်ရောင်ကကျ သနားဖို့ကောင်းတယ်။ ဟိုသုံးကောင်လုံးသေသွားတဲ့အချိန်က ဒီကောင်ရဲ့ အောင်မြင်တဲ့အချိန်။ ကဲ ဘယ်လောက်ဝမ်းနည်းစရာကောင်းသလဲ။ အဲ့တာကြောင့်ပဲထင်တယ် အနက်ရောင်ကို ဝမ်းနည်းခြင်း အထိမ်းအမှတ်အနေနဲ့ သုံးကြတယ်။ ကျွန်တော်တို့ ခရီးတစ်ခုခုသွားခါနီးရင်လည်း လူကြီးတွေက အနက်ရောင်အဝတ်အစား ဝတ်မသွားဖို့ မှာကြတယ်။ ကားကို အနက်ရောင် ဝယ်မစီးတဲ့ လူတွေရှိတယ်။ ကဲကြည့် သူဟာ မကောင်းဆိုးဝါးတစ်ကောင်လို ဆက်ဆံခံရပြန်ရော။ နောက်တစ်ခုက လူဖြူလူမဲ။ ဒါလည်း ဒီကောင်နဲ့ မကင်းဘူး။ လူတွေရဲ့ အသားအရောင်က သူ့နဲ့နီးနီးစပ်စပ် တူနေလို့ ဒီလိုမျိုးခွဲခြားတာတွေ ဖြစ်လာတာနေမယ်။ ဒီဟာကို...
Comments
Post a Comment